要提出分手，其實很難。
呢個世界無人想做衰人，尤其係先失掉愛情嘅一方（失掉愛嘅背後當然有好多原因)，好似無論點開口講分手嘅都一定係負心嗰個。所以自以為見慣世面嘅情人，總係會巧妙地將分手權留比另一方，表面上令對方以為係自己親手結束呢段感情，其實決定權根本就唔係自己手上。
當你嘅另一半已經決定咗唔要你嘅時候，佢會開始對你冷淡，而且對你嘅事無心裝載。成日話好忙唔得閑陪你，但係又有時間陪自己啲朋友。當你有心事同佢傾訴，佢完全無耐性去聽，而且仲會批評你嘅做事方法，批評你嘅個性，批評你啲朋友，批評你嘅衣着品味，甚至批評你嘅尊容。然後再屈指一算，佢都已經有幾個月無掂過你，有時夜晚你想去佢屋企過夜，佢會話因為太攰而拒絕你。從前好肯為你花錢嘅佢突然錙銖必較，唔單止唔再願意為你花費分毫，曾經承諾過想去嘅地方或者慶祝生日等等全部都無做到。
一心諗住同佢攤開講清楚，佢就係支吾以對，或者避開唔想同你講，想再追問落去佢就唔耐煩，甚至怪返你轉頭話你太癡身成日overthinking...其實佢根本就係挑戰緊你嘅耐性！於是你喊過冷戰過同朋友都哭訴過，最後你就會講一句：不如我哋分手啦。
有啲人嘅故事就喺呢度結束(我相信佢一定立刻鬆一口氣...哈)，而有啲人仍然仲有下文。當你講完一句分手之後，唔想做衰人嘅佢態度模稜兩可，令你誤以為仲有轉圜餘地、抱著一絲希望，提出嗰啲咩大家不如冷靜下一兩個禮拜再睇下大家係咪真係掛住對方嗰啲衰嘢，當然最後仍然返去同一結果，希望終究破滅，令人更難接受。
梁靜茹曾經唱過「愛，真的需要勇氣」，然而喺實際生活入面，比愛更需要勇氣嘅，係分手。有時愛情好難分對與錯，若果你已經決定唔再愛一個人就唔好再拖住佢，要有勇氣放手俾佢走去尋找下一個幸福；若果你發現佢已經唔再愛你嘅話，你卻選擇為愛留下，咁你就應該好好提醒自己：值得咩?
有時候，分手或許對彼此更好 。共勉之。
#唔好為唔合適嘅人嘥時間 #女人像鹽
Search